سؤال صغير...

[علا]

السلام عليكم:
إزا سمحتولي رح آخد هالقسم الصغير و اطرح أسئلتي في..
وهاد أول سؤال:
كلما افتح الانترنيت بيطلع شاشتين صغار على اليسار بالشريط تبع ابدأ
ولما بحط المؤشر عليه بيكتب "تم ارسال.. بايت وتم استقبال..بايت"
وما بعرف شو هو يلي تم إرسالو وتم استقبالو؟؟
يا ريت حدا يوضحلي شوي..
كمان سؤال تاني:
شو الفرق بين اختراق الجهاز و وجود الفيروسات فيه؟؟
وشكرا...

[7oussam]

بما أني مو كتير خبير بهالموضوع لح أأقدر أعطيكي شرح صغير وبسيط
يمكن ما يكون موسع بس بيفي بالغرض

بالنسبة للسؤال الأول :
هالشاشتين الصغار يلي عاليسار بينبهوكي لحالة اتصالك بالانترنيت
فلما يكون في عليهن اشارة اكس بالاحمر بتكوني مو متصلة بالنت
ولما يكون لونهما أزرق فأنت متصلة بالنت وهون منميز 1- ازرق فاتح يعني عم يتم ارسال واستقبال بيانات .
.........................................................................2- أزرق غامق يعني ما يتم ارسال واستقبال بيانات ( اتصال خامل ) .

هلئ كل ما بتكتبي عنوان شي موقع أو مثلا وقت سجلتي بمنتدى الهمك بيكون تم ارسال هالبيانات يلي كتبتيها
للشبكة وبتقدر بالبايت فلهيك بتشوفي تم ارسال ... بايت
هلئ كمان لما بتفتحي أي موقع أو بتحملي أي ملف بالحقيقة عم يتم ارسال هالبيانات من الشبكة للكمبيوتر تبعك
فلهيك بينكتب تم استقبال .... بايت

وملاحظة صغيرة : انو اذا كبستي عهالمربع يلي عم يطلعلك بيعطيكي مدة اتصالك بالنت وقديش تم ارسال واستقبال بيانات

السؤال التاني :
اختراق الجهاز بشبهوا وكأنوا حدا قدر يتسلل على بيتي ليخرب فيه او يسرقوا
فممكن ونحنا عالنت حدا يقدر بطريقة او بأخرى يقدر يتسللعلى جهاز الكمبيوتر تبعنا من ضمن ثغرات موجودة بالنظام وبيكون هدفوا اما يسرق ملفات أو يحذف ملفات فبيصير الكمبيوتر تبعنا وكانوا الو بيتصرف فيه على كيفو وهالشي كتير خطير اذا كنا عم نحكي عن مواقع بنوك أو شركات طيران او وكالات أمنية .
(( متل الأفلام الأمريكية لما حدا بيخترق كمبيوتر ال اف بي اي وبيسرق معلومات عن اشخاص ))

هلئ الفيروس :: هو ملف برمجي ويلي مساويه بيكون مبرمج ذكي بيكون مهاموا تخريبيه و بتختلف مهامه من فيروس لآخر
بس من الشائع أنو بيكون هالفيروس مبرمج ليشتغل عند تاريخ معين من قبل المبرمج أو لما بيتم فتحوا مباشرة
ويلي بيساويه انو بينشأ ملفات مالها طعمة وبيخليها تتكاثر ( نسخ لصق ) بشكل تلقائي بسرعة هائلة
أو بيحذف ملفات حتى أو بيعمل خلل بعمل النظام شو ما كان شكل الخلل ...
فلما نلاحظ أي سلوك غير متوقع من الكمبيوتر منفترض أنو في فيروس

ملاحظة :: بيوصل الفيروس أما من أقراص تخزين متنقلة أو من النترنيت ... والفيروس الو انواع معدية فلا سمح الله لوكان عندك فيروس
وحبيتي تعطي رفيقتك شي ملف من عن طريق فلاشة فمجرد ما تحطي الفلاشة بجهازك لح ينتقل الفيروس عليها
وبمجرد ما رفيقتك تحط الفلاشة عندها لح ينتقل الفيروس لجهازها ..

هلئ الوقاية والتداوي :::: بيكون عن طريق برامج مضادات الفيروسات و منع الاختراق
بترك الشباب يحكوا عنهن لأنو ما بعرف فيهن كتير
وبتمنى من الشباب اذا ورد اي خطأ فيما تقدم أنو يصلحولي ومشكورين سلف

[3loo2aa]

كلام حسام كلو صحيح
و هون أنا بدي أنتهز الفرصة لأحكي شوي عن الاختراق و الفيروسات

في شي ناس أسمون هاكر و في ناس أسمون كراكر

الهاكرز : هنن ناس عبقريين و عادة ما بيكونو مختلفين عن غيرون البطباع و بالمنظر و بالتفكير فالمجتمع ما قبلون على وضعهم ( لأنو ما فهمهم ) هدول الناس بيساوو فيروسات نوع من اثبات العبقرية لا أكثر و عادة الكود البرمجي للفيروس ما بيكطو بملف تنفيذي ( يعني ما بيشغلوه ) عادة بيحطوه بملف نصي و بيقلولك أنو هاد الكود بيعمل كزا و كزا و أنت اذا بدك تشغلو بتشغلو على مسؤوليتك

أما الكراكر : هنن ناس مخربين هدفهم التخريب لاستعراض القوة و هدول هنن يلي بينخاف منهم

هلئ فيني قلك أنو عنا بسوريا هي الأمور منسية شوي بحكم كتير عوامل ( مارح وجعلك راسك فيها )
يعني اذا حدا قدر يخترق فعادة ما بيعرف جهاز مين هو مخترق هلئ و بكل بساطة بس تقطعي اتصال النت بيمشي الحال ( طبعاً هو ما عاد يسمحلك تستخدمي الماوس و الكبيورد بس بيكفي تقيمي خط التلفون بيمشي الحال

أما تأثير الفيروسات حالياً من واقع تجربة ( يعني مو من واقع علمي ) بقلك أني لاحظت أنو من 1998 لما اشتغل فيروس تشرنوبل و سبب بأعطال هاردوير على مستوى العالم لليوم
ما طلع فايروس فظيع يعمل شي مشكلة هاردوير ( الا بعض الاستثناءات و تأثيرها ما كان واسع )
الفيروسات هالفترة صارت بتعمل شغلتين و بس
بنتسخ حالها على الهارد فبتعبيه و عادة حجومها بتكون صغيرة يعني لازم يكون عندك آلاف من هي الملفات لحتي تبلشي تحسي بالمشكلة
و الشغلة التانية أنو بتشغل حالها مع تشغيل الويندوز فبتعبي الرام...

شو يعني رام
لنفرض أنك بدك تشغلي ملف صوت ( غنية )
طبعاً هاد الملف موجود على الهارد و لكن الهارد بيكون حجمو كبير و سرعة تعاملو مع المعالج بطيئة نسبياً لذلك لما أنت بدك تشغلي هي الغنية بنتحط الغنية بمكان أسمو رام RAM هي الرام أصغر حجما من الهارد و سرعة تعاملها مع الهارد أسرع بكتير
اذاً اي شي شغال بيكون قاعد بالرام
( غنية .. لعبة .. صورة ..... )

و لما تتعبى الرام بيبلش الجهاز يعلق..
الموضوع مو بهالبساطة طبعاً هو أعقد من هي بكتير
بس هي الخطوط العريضة

كنت فايت قلو لحسام أنو كلامك مزبوط و تفاجأت بحالي كاتب مقالة بدها صفنة ...
و متل ما قال حسام اذا في غلط صلحولي

[علا]

الله يسلم هالإيدين..voussam..3loo2aa..
بس ياريت توضحولي كم شغلة..
شو هو الاتصال الخامل؟ يعني شو بيفرق عن الاتصال العادي؟؟
و مشان الارسال و الاستقبال:
أنا غالباً بكون عم اتصفح بالانترنيت.. يعني ما عم ارسل شي و ما عم حمل شي ومع هيك بيكون عم يكتب تم الارسال و الاستقبال؟!!
ومشان الهاكرز:
ما فهمت كتير شو قصدك عنن 3loo2aa ..
يعني يا ريت تعطيني تفاصيل أكتر لانو كنت ناوية اسأل عنن قبل ما تحكي عنن انت..
يعني لما نقول هاكرز بنكون عم نقصد شي منيح ولا سيئ؟؟
وشو علاقتهن بالاختراق؟؟
وشكرا إلكن كتير عالأجوبة..

[3loo2aa]

بالنسبة لسؤالك الأول..
الاتصال هو اتصال
اتصال خامل يعني حالياً ما عم يرسل شي و ما عم يستقبل شي
و بالنسبة للارسال و الاستقبال..
أنت لما تكوني عم تتصفحي فأنت عم تتصفحي من على جهازك مو من على السيرفر ( المكان يلي فيه هي الصفحة )
فأنت لما تكتبي
http://www.hamak.org
بتكوني فعلياً عم تبعتي بيانات من المتصفح تبعك و يلي هي اسم هاد الموقع للسيرفر ( بالعربية الفصحى : مخدم ) يلي عليه صفحات الموقع .... فبيطلعلك ارسال
و لما يبلش المتصفح يحمل الصفحة يلي طلبتيها على جهازك بتكوني عم تستقبلي بيانات

شو يعني سيرفر ( أو مخدم )
هو جهاز كمبيوتر متل كمبيوترك ( نظرياً ) لكن امكانياتو أضخم بكتييييير من جهازك من كل النواحي
و المواقع يلي أنت عم تتصفحيها هي موجودة على سيرفرات متعددة على الشبكة و طبعاً هي السيرفرات موصولة دائماً بالنت
و عن طريقها بيضل الموقع شغال دائماً

هلئ موضوع الارسال و الاستقبال هو موضوع بيصير تلقائياً و بنصحك ما توجعي راسك فيه كتير
يعني كل ما هنالك أنا بستفيد منو لما كون طالب صفحة و اشارة الويندوز يلي براس صفحة المتصفح عم تتحرك دليل أنو الصفحة لازم تكون عم تتحمل حالياً
فبتطلع على هدول الشاشتين اذا كان ما في لا ارسال و لا استقبال معناها في ضغط على الموقع نفسو اذا كنت طالبة صفحة وحدة
و على خطك انت اذا كنت طالبة مجموعة من الصفحات بنفس الوقت

منجي للهاكر :
منيح و لا سيء هاد شي بيرجع لوجهة نظرك أنت
يعني قلتلك انو هنن بيكتبو فايروس بس ما بيشغلوه و بيحطوه على الشبكة و بيخبو هوياتهم ( يعني كتير صعب ملاحقتهم )
بقى أنت اذا بتشوفي أنو هاد التصرف سليم معناها هنن مناح أو خلينا نقول أنو اذا شفتي انو أسبابون مقنعة و بتعطيهم تبرير لأنو يكتبو فايروسات معناها ما في مشكلة
و اذا شفتي مو سليم معناها في عندون مشكلة
بس بالمجمل هنن مسالمين ( الهاكرز ) مو الكراكرز

علاقة هاد الموضوع بالاختراق
رح اضربلك مثال بسيط
أنو اذا بدك تفوتي على مبنى في حواليه حراسة مشددة و أنت بدك تصلي لأحد المكاتب
لحتى تقدري تفوتي و بدون ما حدا يحس عليكي لازم تكوني بتعرفي خريطة المبنى منيح و بتعرفي طريقة عمل حراس الأمن و هالقصص
و هون نفس الشي
يعني لازم يكون بيعرف تماماً وين الثغرات بالويندوز و يعرف كيف يستغلا لمصلحتو لحتى يفوت و ولا برنامج يحس عليه و ينبهك كمستخدمة
معناها مو مين ما كان بيقدر يخترق أجهزة

و كمان هاد الموضوع بعيد عنا شوي و لا توجعي راسك فيه

من وجهة نظري بس اذا حابة تعرفي كمان ما في مشكلة

[علا]

شكراً مرة تانية 3loo2aa:
الشرح بيكفي وبيوفي..
على فكرة أنا بحب وجع الراس يلي بيجي من ورا العلم..
يعني قد ما قدرت تشرحلي بيكون كتير منيح..
" بس طبعاً مو على حساب وقتك كمان"..

[3loo2aa]

تكرمي
و لا يهمك

[علا]

الله يكرمك...3loo2aa
في عندي سؤال جديد..
في برنامج اسمو Via Raid Tool لما بعتت الكمبيوتر على الصيانة آخر مرة منزلينوا عالجهاز..
وكلما بشعل الكمبيوتر بيطلعلي مربع حوار بهدا البرنامج وبيرجع بيسكر لحالو ..
وأنا مالي عرفانة شو هاد البرنامج وشو بيعمل؟؟
يعني إزا حدا عندو فكرة عنو وشو بيعمل يخبرني...

[MixMan]

استغربت هل السؤال منك بالذات أو بالاحرى من الكفو يلي نزلك ياه .
لانو هاد برنامج للشركات الكبيرة والسيرفرات ,, اذا عندك بجهازك هاردين فالويندوز بشوفون على انون هاردين بس لما تنزلي هاد البرنامج بصير يشوفون هارد واحد ويكتب على الهارين نفس المعلومات وبنفس الوقت
يعني اذا حملتي من النت صورة ,, فرح تنزل عل الهاردين مع بعض _ بدون ماتلاحظي_ ولما واحد من الهاردات يتعطل فبياخد الهارد التاني مكانو مباشرة
وفي تقنيات اضافية لهاد البرنامج انو ممكن يكتب نص المعلومات هون ونصها هون مشان تزيد السرعة للضعف _ نحنا منعرف انو اكتر شي ببطء الكمبيوتر هل الايام هوو الهارد _

[أبو الفوز]

تسمحلي يا علا أسأل سؤال كمان هون,
بتوقع مافي مشكلة مهيك.
أبو المكس, طب أنا لا شركة كبيرة ولا سيرفر, وحبيت نزل عالبرنامج شو هي المساؤى, على اعتبار أنو ما سمعت من قبل عن هادا البرنامج.

[MFS]

رح جاوب عن عمار مافي مساؤى بس في عدة أنواع من الريد وكل نوع عن نوع في إلو مزايا
الفكرة منو في حال إنضرب أي هارد يقدر يقلع السيرفر بدون مشاكل وتكون الداتا بيز شغالة
يعني على كومبيوتر مارح تسفيد متل ما إذا أنت عندك سيرفر

إنتبهوا منيح هارد كامل مو بارتشين

[MixMan]

متل ما قال مجد وكمان ...
هاد برنامج , يعني بيشتغل بالويندوز , أما تقنية الريد فهيي المفروض تشتغل من البيورس
فيا ابو الفوز , اذا عندك هاردين ومواصفات كمبيوترك حلوة فنزل البرنامج وحطو على وضع التسريع مو النسخ وفعلا الاداء بيتحسن بشكل ملحوظ, بسسسسسسس مصيبة اذا انضرب واحد من الهاردين , رغم انو فيو أداة لترجع تعملك تجميع للقطع من الهاردين بس على الغالب ماتشتغل

[3loo2aa]

حلو
شايف يا علا رح نصف كلنا جنبك

[علا]

أبو الفوز:لو اجت متأخرة شوي..بس أكيد ما في مشكلة ولو...
3loo2aa:اي شي كتير منيح انو غيري يستفيد من اسئلتي المتواضعة ..
هاد الشي بيبسطني أكيد..

[علا]

MixMan : شكراً عالشرح..
وهلأ خطر على بالي سؤال لاني كنت بدي حط الجملة السابقة بالرد يلي قبل هاد
بس نسيت وبعتت الرد قبل ما حطاoops: ops
: بقدر عدل على شي مشاركة بعد ما ارسلها؟؟

[علا]

لا تواخزوني...والله حاسة حالي جدبة كتيييير!!
قال اجيت بدي اتفالح وعدل عالمشاركة رقم 8 قام خبصت بالابتسامات تبع المشاركة 9...

[علا]

في عندي سؤال عن برنامج Adobe Reader 8 ..
هلأ هو متل ال word ؟؟يعني منقدر نكتب في نص وانسق عليه مثلاً ؟؟
ولا بيفرق عنه ؟؟
ما جاوبتوني عالسؤال الماضي.!!!
بقدر عدل على المشاركة بعد ما ارسلها ؟؟

[MixMan]

لأ مافينك تعدلي مشاركتك ..
ومافينك تكتبي على الأكروبات Adobe Reader متل الورد _ ماهوو اسمو reader

[MixMan]

استدراك ...
فينك تحولي ملف كاتبتيه عل ال Word ل pdf مع التنسيقات وكل شي عن طريق برنامج متل Adobe Acrobat Professional

[علا]

بس أنا صرت شايفة أكتر من كتاب الكتروني مكتوب بها البرنامج !!
طيب وليش لأكتب بالوورد و بعدين أنقل عالبرنامج ؟
يعني هو إلو ميزات أحسن من الوورد مثلاً ؟